जनमत–जनक प्रधान सेवा सम्मानबाट कसजू सम्मानित

बनेपा । सिन्धुपाल्चोकका पत्रकार तथा साहित्यकार सुरेश कसजू ‘जनमत–जनक प्रधान सेवा सम्मान’बाट सम्मानित भएका छन् ।

काभ्रेस्थित जनमत वाङमय प्रतिष्ठानको ३९औं वार्षिकोत्सवको अवसरमा कसजूलाई सम्मान गरिएको हो । प्रतिष्ठानको आयोजनामा शनिबार बनेपामा भएको कार्यक्रममा कसजुलाई साहित्यकार तथा प्रा.डा. अभि सुवेदीले दोसल्ला ओढाएर सम्मान गरे । कसजू ४० को दशकदेखि साहित्य र पत्रकारितामा क्रियाशील छन् । सिन्धु साहित्यको विकास, संरक्षण र उत्थानमा महत्वपूर्ण भूमिका निर्वाह गरेबापत उनी सम्मानित भएका हुन् ।

उनले जुगल साहित्य मासिक, विप्लव मासिक लगायत पत्रपत्रिकामा सम्पादकको भूमिका निर्वाह गरेका थिए । दुःखी प्रकाशनमार्फत सर्जकहरुको साहित्यिक कृति प्रकाशन, नव सर्जकहरुका लागि प्रोत्साहन र संरक्षणको भूमिकामा कसजू लामो समयदेखि समर्पित छन् ।गोरखापत्र संस्थानका पूर्व बोर्ड सदस्यसमेत रहेका कसजुको सम्पादकत्वमा सिन्धुसन्देश साप्ताहिक, सर्वपक्ष दैनिक, जुगल खबर अनलाईन सञ्चालन तथा प्रकाशन हुँदै आएको छ । प्रमुख अतिथि सुवेदीले २०७७ र २०७८ सालमा सम्मानित हुनु भएका स्रस्ताहरुलाई सम्मान गरेका थिए ।

२०७७ र २०७८ सालको दीपा–जनमत सम्मान भगवती अर्याल पाण्डे र युवराज नयाँघरेलाई, गणेश खिलकुमारी दुवाल–जनमत सम्मान श्रीओम श्रेष्ठ रोदन र अशेष मल्ललाई, हृदयचन्द्र–जनमत वरिष्ठ साधक सम्मान रामकुमार पाण्डे र पद्मावती सिंहलाई, २०७८ को जनमत–जनक प्रधान सेवा सम्मान मणी लोहनीलाई सम्मान गरिएको हो । त्यसैगरी केवलपुरे–जनमत सम्मान सुमित्रा सुमि र जलेश्वरी श्रेष्ठलाई, जनमत–महेन्द्रलाल कलाकार सम्मान विक्रमश्री र राजु तुलाधरलाई, कमला सैंजू–जनमत सम्मान डा.गीता त्रिपाठी र तारा केसीलाई, जनमत–राजभाई सहयात्री सम्मान दिलसुन्दर श्रेष्ठ र हरिप्रसाद चौलागाईलाई, भारती–जनमत साहित्यिक पत्रकारिता सम्मान–सीता राई थुलुङ र बालिका गिरीलाई सम्मान प्रदान गरिएको छ ।

जनमत–केदार सुदर्शना बालसाहित्य सम्मान–अनन्तप्रसाद वाग्ले र विजयराज आचार्यलाई, जनमत–सिचिधर्म र संस्कृति सम्मान शिला पन्त र ऋषिकेशव कँडेललाई, जनमत–मित्र अनुवाद राष्ट्रिय सम्मान कृष्णप्रकाश श्रेष्ठ मरणोपरान्त र डा. गंगाप्रसाद अकेलालाई तथा जनमत–दीपक वैद्य स्वास्थ्य सम्मान डा. रविन्द्र समीर पाण्डे र योगेन्द्र प्रधानाङ्गलाई प्रदान गरिएको छ । यसैवर्षदेखि प्रदान गरिएको जनमत–ज्ञानरत्न मंगलतारा राष्ट्रिय सम्मान टङ्कबहादुर आलेमगर, उदयपुर र जनमत–पूर्णमान लुचि समाजसेवा सम्मान रुमी राजभण्डारीलाई प्रदान गरिएको छ । कार्यक्रमको सभातित्व जनमत वाङ्मय प्रतिष्ठानका अध्यक्ष्य मोहन दुवाल भएको उक्त कार्यक्रममा दुवालले मन्तब्य राख्दै साहित्यिक गतिविधि चोखो भावनामा लिप्त भएर गरे पछि असम्भव भन्नु केही नभएको बताए ।

‘यहि भावनाले जनमतको यात्रा निरन्तर हुन पाएको हो’, उनले भने– ‘जनमतको यात्रामा विभेद कुनै पनि क्षेत्रमा पाउन सक्नु हुन्न । सबैको मनमा जनमत पुर्याउने हाम्रो पवित्र उद्देश्य हो ।’ सम्मानित प्रतिभाहरु मध्यवाट अशेष मल्ल, रामकुमार पाडे तथा श्रीओम श्रेष्ठ, रोदनले अहिलेको साहित्य र पुुरस्कार सम्बन्धमा आ–आफ्ना धारणा राखे ।

कार्यक्रममा जनमत प्रकाशनवाट प्रकाशित ५ वटा कृतिहरु जनमत कथा, जनमत लघु कथा, जनमत नियात्रा, जनमत जानकारी, गंगा लिगल सृष्टि, दृष्टि पुस्तक विमोचन गरिएको थियो । कुतः प्रकाशन भक्तपुरवाट प्रकाशित मोहन दुवालको नेपालभाषाको पुस्तक जिः न्हायंकः, न्हायकने दुनें जिः तथा भारती श्रेष्ठको विविधा पुस्तक पनि विमोचन गरिएको थियो ।

कार्यक्रममा स्नेह सायमी, लक्ष्मी माली, मणी लोहनी, नरेन्द्रबहादुर श्रेष्ठलगायतले कविता वाचन गरेका थिए भने सूर्यप्रसाद लाकोजू, राम सुन्दर देउजा तथा विमल ताम्राकारले विमोचित पुस्तकको चर्चा गरिएको थियो । डा. कृष्ण सुवेदीलेले सञ्चालन गरेको कार्यक्रममा सिर्जना दुवालले सहभागि र स्रष्टाहरुलाई धन्यवाद दिएकी थिइन् ।