जिल्ला स्तरीय वक्तृत्वकला प्रतियोगितामा शर्मा प्रथम

चौतारा । बागमती प्रदेश सरकार सामाजिक विकास मन्त्रालय प्रदेश युवा परिषद् अन्र्तगत जिल्ला युवा समिति सिन्धुपाल्चोकले आयोजना गरेको जिल्लास्तरीय वतृत्वकला प्रतियोगितामा चौतारा बहुमुखी क्याम्पसका अनिल शर्मा प्रथम भएका छन् ।

प्रतियोगितामा विजयी शर्माले नगद १५ हजार रुपैंयासहित प्रमाणपत्र प्राप्त गरे । त्यस्तै द्वितीय जयन्ती बस्नेत र तृतीय श्रीकृष्ण लामा भए । उनीहरुले क्रमसः १० हजार, ५ हजार रुपैंया र प्रमाणपत्र प्राप्त गरे । चौतारा बहुमुखी क्याम्पसका उपप्राध्यापक जगतमणी सोती, पत्रकार एवम् राष्ट्रिय कविता प्रतियोगिता– २०७८ का स्वर्णपदक विजेता सुन्दर शिरीष र शिक्षक सुदर्शन न्यौपानेको समूहले प्रतियोगिहरुको मूल्याङ्कन गरेका थिए । युवा र नवप्रवर्तन शीर्षकमा आयोजना गरिएको प्रतियोगितामा जिल्लाभरका विद्यालय र क्याम्पसहरुबाट सहभागिता रहेको थियो ।

कार्यक्रमको उद्घाटन गर्दै चौतारा साँगाचोकगढी नगरपालिकाका प्रमुख कृष्णप्रसाद सापकोटाले युवाहरुनै देशको मूल खम्बा भएका कारण युवावर्गको विकासमा नगरपालिका सदैव प्रतिबद्ध रहेको बताए । ‘युवा विद्यार्थीलेनै देशको भविष्य निर्माण गर्ने भएकाले यो वर्गलाई विशेष महत्व दिनुपर्दछ’, उनले भने– ‘युवा विद्यार्थी वर्गले पनि आफ्नो सोच र चेतनालाई देश विकास र परिवर्तनमा लगाउनु पर्दछ ।’

कार्यक्रममा चौतारा साँगाचोकगढी नगरपालिका वडा नं. ५ का पूर्व वडा अध्यक्ष नरमान श्रेष्ठ, प्रेस सेन्टर नेपाल जिल्ला समन्वय समितिका उपाध्यक्ष निर्मल बस्नेत लगायतले शुभकामना व्यक्त गरेका थिए । कार्यक्रममा सञ्चारकर्मी, विद्यार्थी नेता, शिक्षक, विद्यार्थीहरुको उपस्थिति रहेको थियो ।

कार्यक्रमका सभाध्यक्ष बागमती प्रदेश युवा परिषद्का स्वयम्सेवक रुपक दुलालले युवा र विद्यार्थीको विचारलाई अझ सशक्त बनाउन वतृत्वकला प्रतियोगिताको आयोजना गरेको बताए । उनले प्रतियोगितामा प्रथम हुनेले प्रदेशस्तरीय वतृत्वकला प्रतियोगितामा सहभागिता जनउने अवसर प्राप्त गरेको जानकारी दिँदै कार्यक्रमलाई सहयोग पुर्याउने सम्पूर्णप्रति धन्यवाद प्रदान गरे ।

कार्यक्रमको सञ्चालन चौतारा बहुमुखी क्याम्पसका स्ववियु सभापति अमृत श्रेष्ठले गरेका थिए ।