साईबर क्राइम र लागुपदार्थ दुव्र्यसनबारे सचेतना

चौतारा । किशोर किशोरी एवम् विद्यार्थीलाई सचेत गराउने उद्देश्यका साथ प्रदेश युवा परिषद् बागमती, जिल्ला युवा समिति सिन्धुपाल्चोकले साईबर क्राइम र लागुपदार्थ दुव्र्यसनबारे एकदिने सचेतना कार्यक्रम गरेको छ ।

जिल्ला प्रहरी कार्यालय सिन्धुपाल्चोकको समन्वयमा शुक्रबार जिल्ला प्रहरी कार्यालयमा गरेको सो कार्यक्रममा चौतारा साँगाचोकगढी नगरपालिका भित्रका क्याम्पस र माद्यमिक विद्यालयका विद्यार्थीहरुको सहभागिता थियो । इन्टरनेट, साईवर क्राइम, सामाजिक सञ्जाल र यसको उपयोगिता, इन्टरनेटमा हुने बाल दुव्र्यवहार, जोखिम, बच्न सकिने उपाय आदि विषयमा जिल्ला प्रहरी कार्यालयका प्रमुख एसपी बालनरसिं राणाले सहजीकरण गरेका थिए ।

उनले इन्टरनेटको सदुपयोगसँगै दुरुपयोग समेत बढेकाले हरेक किशोर किशोरी मात्र हैन, अभिभावक समेत सचेत हुनपर्ने आवश्यक्ता औल्याए । त्यस्तै उनले लागुऔषधले पार्ने नकारात्मक प्रभावबारे विद्यार्थीहरुलाई सचेत गराएका थिए । सानै उमेरदेखि बालबालिकालाई सम्झाउँदा कुलतमा फँस्ने जोखिम कम हुने उनले बताए । श्रव्यदृष्यसहितको प्रस्तुतीबाट सहजिकरण गरेका राणाले साईबर क्राइम र लागुपदार्थ दुव्र्यसनबाट युवा पुस्ता जोगिनुपर्नेमा जोड दिए ।

कार्यक्रममा नेपाल पत्रकार महासंघ बागमती प्रदेश परिषद् सदस्य एवम् प्रेस सेन्टर नेपाल सिन्धुपाल्चोकका अध्यक्ष सुन्दर शिरीषले युवा, विद्यार्थीहरु लागुपदार्थ र साईबर क्राईमको निशानामा रहेको भन्दै यो समूह गम्भीर हुनुपर्ने बताए । ‘प्रविधिको क्रमिक विकाससँगै त्यसले विक्रिति पनि निम्त्याईरहेको छ’, उनले भने– ‘लागुपदार्थको प्रयोगबाट क्रमसः माथि उक्लदै युवा पुस्ता विद्युतीय अपराधको जालोमा फसिरहेको छ, त्यसलाई न्यूनिकरण गर्न युवा विद्यार्थीको भूमिका उच्च रहन्छ ।’ अबको समाज कस्तो बनाउने भन्ने भूमिका युवा विद्यार्थीहरुको रहेको बताउँदै उनले यस्ता विकृति र अपराधबाट टाढै रहन सुझाव दिए ।

त्यस्तै चौतारा साँगाचोकगढी नगरपालिका– ५ का पूर्व वडा अध्यक्ष नरमान श्रेष्ठले आफू र घरपरिवारबाटै अपराध र विक्रितिलाई रोक्न सुरु गर्नुपर्ने धारणा राखे । कार्यक्रममा सहभागिहरुलाई प्रहरी प्रमुख राणा, शिरीष र श्रेष्ठले प्रमाणपत्र प्रदान गरेका थिए । आयोजकले अतिथिहरुलाई मायाको चिनो प्रदान गरेको थियो ।

विद्यार्थीहरुलाई कुलतबाट फस्न सचेत गराउने उद्देश्यले कार्यक्रमको आयोजना गरिएको कार्यक्रमको अध्यक्ष एवम् प्रदेश युवा परिषद् बागमतीका स्वयम्सेवक रुपक दुलालले सिकेको कुरालाई व्यवहारमा उतारी सक्षम नागरिक बन्न अनुरोध गरे ।