तेक्वान्दोको प्रतियोगिताको तयारी तीव्र

चौतारा । तेस्रो सिन्धु राष्ट्रिय तेक्वान्दो प्रतियोगिताको तयारी तीव्र पारिएको छ । आगामी मंसिर १९ र २० गते बाह्रबिसेमा हुने प्रतियोगिताको तयारी तीव्र पारिएको आयोजक सिन्धुपाल्चोक तेक्वान्दो संघका अध्यक्ष प्रेम भण्डारीले जानकारी दिए ।

‘प्रतियोगिताको तयारी तीव्र रुपमा भइरहेको छ । प्रतियोगिता स्थल, बसोबासलगायतको काम अन्तिम चरणमा पुगेको छ’, अध्यक्ष भण्डारीले भने– ‘खेलाडीसँग दर्ता शुल्क पनि लिँदैनौं र खानेबस्ने सबै सुविधा आयोजकले बेहोर्ने छौं ।’ दुई दिने प्रतियोगितामा सात प्रदेश, तीन विभागीय टोली त्रिभुवन आर्मी, नेपाल पुलिस, एपीएफ र आयोजकको एक गरी ११ टोलीका खेलाडीले प्रतिस्पर्धा गर्ने छन् । जसमा एसियाली खेलकुद, दक्षिण एसियाली खेलकुदलगायत अन्तर्राष्ट्रिय प्रतियोगितामा सहभागी खेलाडीहरूले पनि प्रतिस्पर्धा गर्ने छन् ।

प्रतियोगितामा ग्योरोगीतर्फ १२ सिनियर र चार जुनियर गरी १६ तौल समूहमा प्रतिस्पर्धा हुनेछ । यस्तै पुम्सेमा महिला तथा पुरुष एकल, पेयर र टिम पुम्सेमा प्रतिस्पर्धा हुनेछ । बाह्रबिसे नगरपालिकाको सहआयोजनामा हुन लागेको प्रतियोगिताको टिम च्याम्पियनले ७० हजार नगद पुरस्कार पाउने छन् । यस्तै दोस्रो हुनेले ५० हजार र तेस्रो हुने टोलीले ३० हजार रुपैयाँ पुरस्कार पाउने छन् । प्रतियोगिताका उत्कृष्ट महिला र पुरुष खेलाडीलाई जनही १० हजार रुपैयाँ प्रदान गरिने जनाइएको छ । आयोजक टोलीका स्वर्ण विजेता खेलाडीलाई जनही पाँच हजार रुपैयाँ प्रदान गरिने अध्यक्ष भण्डारीले जानकारी दिए ।

२०५४ सालमा बाह्रबिसे डोजाङमार्फत सिन्धुपाल्चोकमा तेक्वान्दो भित्र्याएका भण्डारीले २०६९ सालमा पहिलो र २०७१ सालमा दोस्रो सिन्धु राष्ट्रिय तेक्वान्दो प्रतियोगिता आयोजना गरेका थिए । ‘यो तेस्रो प्रतियोगिता गर्न २० लाख भन्दा बढी लाग्ने अनुमान गरेका छौं’, भण्डारीले भने– ‘यो रकम हामीसँग छैन । हामीले विभिन्न निकायलाई सहयोग मागेका छौं । त्यो पनि अपुग भयो भने सम्पत्ति बेचेर भएपनि प्रतियोगिता सम्पन्न गर्छु ।’ उनले प्रतियोगिताको सुरुवात गर्न आफूले लगाएको सुनको सिक्री बेचेको बताए ।

बाह्रबिसे नगरपालिकाका नगर प्रमुख बालकृष्ण बस्नेतले लामो समयदेखि खेलकुद क्षेत्रमा क्रियाशील रहँदै आएका भण्डारीको अभियानलाई अगाडि बढाउन र नयाँ खेलाडी उत्पादनमा सहयोग पु¥याउन प्रतियोगितामा सहआयोजकका रुपमा जोडिएको बताए ।