२० विपन्न दलित परिवारलाई बाख्रा प्रदान

चौतारा । चौतारा साँगाचोकगढी नगरपालिका वडा नं. २ ले वडा भित्रका २० विपन्न दलित परिवारलाई बाख्रा प्रदान गरेको छ ।

वडा कार्यालयले दलित विपन्न परिवार पहिचान गरी आयआर्जनमा टेवा पुर्याउने उद्देश्यले बाख्रा वितरण गरेको वडा अध्यक्ष सुदीप श्रेष्ठले बताए । ‘वडा कार्यालयले यो वडाका विपन्न दलित समुदायको आयआर्जनमा टेवा पुगोस् भन्ने उद्देश्यले बाख्रा वितरण गरेको हो’, उनले भने– ‘बाख्रा पालनको लागि यो क्षेत्र उपयुक्त पनि छ, जसले गर्दा वितरण गरिएको बाख्रा पालेर आम्दानीको स्रोत जुटाउन सहयोग पुग्ने अपेक्षा हामीले लिएका छौं ।’

२ लाख बराबरको उन्नत जातको बयर बाख्रा वितरण गरिएको वडा कार्यालयले जनाएको छ । वडा कार्यालयले वितरण गरेको बाख्राको बिमा गर्न पनि सहयोग गरेको छ । ५० प्रतिशत वडाले सहयोग गर्ने र ५० प्रतिशत कृषकले बेहोर्ने गरी बिमा गरिएको वडा सदस्य लक्ष्मी नेपालीले बताईन् । चौतारा साँगाचोकगढी नगरपालिका पशु शाखाको समन्वयमा बाख्राको बीमा गरिएको थियो ।

कृषि तथा पशु सेवा अनुदान अन्र्तगत दलित समुदायका विपन्न परिवारलाई बाख्रा वितरण गर्न उपभोक्ता समूह निर्माण गरिएको थियो । ‘हामीले वितरण गरिएको बाख्राको अवस्था कस्तो छ, सही सदुपयोग भएको छ कि छैनौं समेत निगरानी गछौं’, उपभोक्ता समितिका अध्यक्ष केशरबहादुर विकले भने– ‘वितरण गरिएको बाख्राबाट विपन्न समुदायको आयआर्जनमा टेवा पुगोस् भन्ने नै हाम्रो मूख्य लक्ष्य हो ।’

वडा कार्यालयले बाख्रा दिएपछि चौतारा साँगाचोकगढी नगरपालिका वडा नं. २ की मिठू विक खुसी भईन् । एकल जीवन बिताईरहेकी उनले आफूजस्तो कोही नभएको गरीवलाई वडा कार्यालयले गरेको सहयोग बाँच्ने साहारा बनेको बताईन् ।