जिल्ला खेलकुद विकास समिति अध्यक्ष दंगाललले गरे पदभार ग्रहण

चौतारा । जिल्ला खेलकुद विकास समिति सिन्धुपाल्चोकको अध्यक्षमा नियुक्त भएसँगै आईतबार रामकृष्ण दंगालले पदभार ग्रहण गरेका छन् ।

युवा तथा खेलकुद मन्त्रालय बागमती प्रदेशको असार १३ गतेको निर्णय गरी उनलाई अध्यक्ष नियुक्त गरिएको थियो । ४ महिनादेखि रिक्त रहेको अध्यक्ष पद सम्हालेलगत्तै दंगालले सिंगो जिल्लाको खेलकुदको विकासमा आफू कटिबद्ध रहेको जनाए । पदभार ग्रहण गर्दै उनले आफ्नो एकमात्र लक्ष्य जिल्लाको खेलकुदलाई राष्ट्रिय अन्र्तराष्ट्रिय स्तरमा पुर्याउन रहने जनाए ।

‘जिल्लाको खेलकुदभित्र विभिन्न समस्या होलान् तर तिनलाई पन्छाउँदै सबै खेलसम्बद्ध संघसंस्था र खेलप्रेमीको सहयोगमा जिल्लाको सबै खेललाई उठाउने प्रयत्न गर्नेछु’, दंगालले भने– ‘एकल प्रयासले मात्रै यो सम्भव हुँदैन, यसको लागि स्थानीय सरकारदेखि सबैको सहयोग अपरिहार्य छ ।’

पदभार ग्रहण तथा स्वागत कार्यक्रममा सम्पूर्ण खेलका संघ संस्थाहरुको तर्फबाट तेक्वान्दो संघ सिन्धुपाल्चोकका अध्यक्ष प्रेम भण्डारीले शुभकामना व्यक्त गर्दै केन्द्रबाटै खेललाई उपेक्षा गरिदै आएको बताए । ‘खेल क्षेत्रमा बढी राजनीति छिरेको छ, कुन खेलाडीले कति खेल क्षेत्रको उन्नयनमा लागेको छ, कसले कति मेडल ल्याएको छ भन्दा पनि राजनीतिक आस्थाको आधारमा छुट्याईने गरेको छ’, उनले भने– ‘यस्ता क्रियाकलाप जिल्ला खेलकुद विकास समितिले चिर्नु पर्दछ ।’

भण्डारीले खेल क्षेत्रलाई उठाउन नवनियुक्त अध्यक्षले प्रयत्न गर्ने विश्वास व्यक्त गर्दै सबै खेल संघ संस्थाहरुसँग समन्वय गरेर अगाडि बढ्न आग्रह गरे । कार्यक्रममा चौतारा साँगाचोकगढी नगरपालिकाका जनप्रतिनिधिहरुले शुभकामना दिएका थिए । कार्यक्रममा जिल्ला खेलकुद विकास समितिका नवनियुक्त सदस्य रमेश श्रेष्ठले समेत पदभार ग्रहण गरेका छन् ।